SRINIVAS P
భూతలస్వర్గం లో వెండితెర వెలుగులు ..
భూతల స్వర్గంగా గుర్తింపు పొందిన కశ్మీర్ ఒకప్పుడు సినిమా షూటింగ్లకు పెట్టింది పేరు. 80వ దశకం ముందు వరకూ కశ్మీర్ అందాలను అనేక మంది తమ సినిమాల్లో పోటీపడి చూపించారు. 1980 దశకం వరకు కశ్మీర్ లోయలో సినిమాహాళ్లు ఉండేవి.
రెండు ఉగ్రవాద సంస్థల హెచ్చరికల కారణంగా యజమానులు వాటిని మూసివేశారు. పదేళ్ల అనంతరం వాటిని మళ్లీ తెరవడానికి ప్రయత్నించినా రెండోసారి బెదిరింపులు వచ్చాయి. 1999లో శ్రీనగర్కు గుండెకాయ వంటి లాల్చెక్లోని రీగల్ థియేటరున్ను ఉగ్రవాదులు బాంబులతో పేల్చివేశారు. అనంతరం నీలం, బ్రాడ్వే థియేటర్లను ప్రారంభించినా ప్రేక్షకులు ఎవరూ రాకపోవడంతో వాటిని మూసివేయాల్సి వచ్చింది. ముష్కర మూకల బెదిరింపులకు భయపడి అక్కడ క్రమంగా సినీ పరిశ్రమ ఏకంగా కనుమరుగయ్యే దుస్థితికి వచ్చేసింది.
సుమారు మూడు దశాబ్దాల తర్వాత కాశ్మిర్ లో కాశ్మిరీలు థియేటర్ లో సినిమా చూస్తున్నారు. ఉగ్రవాదం ముప్పు భయంతో మూడు దశాబ్దాల కిందట జమ్మూ కశ్మీర్లో మూతబడిన సినిమాహాళ్లు పునఃప్రారంభమయ్యాయి.
థియేటర్లు మూతపడడంతో వాటి స్థానంలో ప్రభుత్వమే మల్టీఫ్లెక్స్లను నిర్మించింది. దక్షిణ కశ్మీర్లోని సోఫియాన్, పుల్వామా ల్లో నిర్మించిన మల్టీప్లెక్స్ లను జమ్మూ కశ్మీర్ లెఫ్టినెంట్ గవర్నర్ మనోజ్ సిన్హా ప్రారంభించారు. ప్రభుత్వ ఆధ్వర్యంలోని మిషన్ యూత్ విభాగం, ఆయా జిల్లా యంత్రాంగాలు సయుంక్తగా ఈ మల్టీప్లెక్సులను నిర్మించాయి.
ఈ సందర్భంగా లెఫ్టినెంట్ గవర్నర్ మనోజ్ సినా మాట్లాడుతూ… ఇవి బహుళ ప్రయోజన సినిమాహాళ్లని, ఇక్కడ సినిమాలతోపాటు, సమాచారం, యువత నైపుణ్యాభివృద్ధికి సౌకర్యాలు ఉంటాయని తెలిపారు. త్వరలో జమ్మూ కాశ్మీర్లోని ప్రతి జిల్లాలోనూ మల్టిఫ్లెక్స్ను ప్రారంభిస్తామని ఆయన వెల్లడించారు. ఈ సినిమా థియేటర్లను యువతకి అంకితం చేస్తున్నట్టు గవర్నర్ పేర్కొన్నారు. ప్రభుత్వం ఏదైనా మెసేజ్ పంపాలని కోరుకుంటుందా? అన్న ప్రశ్నకు సిన్హా స్పందిస్తూ.. “అటువంటిదేం లేదు.. ఇది షాహిద్ ఇక్బాల్ చౌదరి ఆధ్వర్యంలో మిషన్ యూత్ చేపట్టిన కార్యక్రమం” అని చెప్పారు.
ఒక థియేటర్లో ఆర్ఆర్ఆర్, ఇంకో దాంట్లో భాగ్ మిల్కా భాగ్ సినిమాలను ప్రదర్శించారు. శ్రీనగర్లోని సోంవార్ ప్రాంతంలో నిర్మించిన మొట్టమొదటి ఐనాక్స్ మల్టీ ప్లెక్స్ కూడా ప్రారంభమైంది. ఇందులో 520 సీట్ల సామర్థ్యంతో మూడు థియేటర్లు ఉన్నాయి. లాల్ సింగ్ ఛడ్డా సినిమాతో ప్రారంభంకానుంది. ఒకప్పుడు కశ్మీర్ షూటింగ్లకు స్వర్గధామంలా ఉండేది. ఆ వైభవాన్ని పునరుద్ధరించేందుకు కొత్త ఫిల్మ్ విధానాన్ని తీసుకురావాలని ప్రభుత్వం భావిస్తోంది.
అలా….
మళ్లీ ఇన్నాళ్లకు భూతలస్వర్గం లో వెండితెర వెలుగులు ..
విరజిమ్మాయి,
