ASHOK S
5 గంటలు పాటు ఈత కొట్టి.. రికార్డు సృష్టించిన 9 ఏళ్ల చిన్నారి
ఓ 9 ఏళ్ల బాలిక నిర్విరామంగా ఈత కొట్టి గోల్డెన్ బుక్ ఆఫ్ రికార్డ్స్ లో చోటు సంపాదించుకుంది. నిరంతరాయంగా 12 గంటలు పాటు ఈదడమే తన లక్ష్యమని ఆ చిన్నారి తెలిపింది.
వివరాల్లోకి వెళ్తే ఛత్తీస్ గడ్ లోని దుర్గ్ జిల్లాకు చెందిన పురఈ అనే గ్రామం క్రీడలకు ప్రసిద్ధి చెందింది. కాగా ఆ గ్రామానికి చెందిన తనుశ్రీ కోసరే (9) ఈతపై ఆసక్తితో శిక్షణ తీసుకుంది. తనుశ్రీ రోజూ 7 నుంచి 8 గంటలపాటు సాధన చేసేది.
అయితే ఈ ఆదివారం ఆ చిన్నారి ఐదు గంటల పాటు ఏకబిగిన చెరువులో ఈది గోల్డెన్ బుక్ ఆఫ్ రికార్డ్స్ లో చోటు దక్కించుకుంది. ఇంత చిన్న వయసులోనే 5 గంటల పాటు ఈది అందరి ప్రశంసలు అందుకుంది.
ఈ సందర్భంగా ఆమె మాట్లాడుతూ “ఇలా తను అనుకున్నది సాధించడం తనకు చాలా ఆనందాన్నిచ్చింది. నిరంతరాయంగా 12 గంటలపాటు ఈదడమే నా లక్ష్యం. అది కూడా నేను కచ్చితంగా సాదిస్తాను.” అని చెప్పింది.
