ASHOK S
ఇంజినీర్ నుంచి 19 లక్షలు దండుకున్న సైబెర్ గాళ్ళు.
సైబర్ నేర గాళ్లు ఓ ఇంజినీర్ నే బోల్తా కొట్టించారు. ఆ ఇంజినీర్ నుండి ఏకంగా 19 లక్షలు ఊడ గొట్టారు.
వివరాల్లోకి వెళ్తే విజయవాడకు చెందిన సాఫ్ట్వేర్ ఇంజనీర్ అయిన ఓ యువతి ఫోన్ కి “ఖాళీ సమయాల్లో పార్ట్ టైం జాబ్.. తక్కువ పని, ఎక్కువ డబ్బులు సంపాదించవచ్చు” అంటూ మెసేజ్ వచ్చింది. ఈ మెసేజ్ ను చూసి జాబ్ తో పాటు, పార్ట్ టైం జాబ్ చేసి ఇంకా డబ్బు సంపాదించవచ్చని భావించిన ఆ యువతి ఆ మెసేజ్ పంపిన కేటు గాళ్లని సంప్రదించింది. వాళ్లు లైక్ చేయమన్న విడియోలకు లైకులు కొట్టి 150 రూపాయలు సంపాదించింది. ఆ తరువాత కూడా ఇలాగే చేసి 300 రూపాయలు సంపాదించింది. ఇలా వాళ్ళు చెప్పినట్టుగా డబ్బు వస్తుండడంతో ఆమె పూర్తిగా ఆ కేటు గాళ్ల బుట్టలో పడిపోయింది. ఈ సమయంలోనే మరింత డబ్బును సంపాదించొచ్చని ఆమెకు ఆశ చూపించారు.
అయితే ఈ సారి డబ్బు రావాలంటే ఓ 1000 రూపాయలు వెచ్చించాలని, అలా వెచ్చిస్తే డబ్బు రెట్టింపు అవుతుందని మాయ మాటలు చెప్పారు. ఈ మాటలను నమ్మిన ఆ యువతి అలాగే వెచ్చించగా.. ఆ డబ్బులు రెట్టింపు అయ్యి 16 వందలు ఆమె అకౌంట్లోకి వచ్చి చేరాయి. దీంతో వాళ్ళని పూర్తిగా నమ్మిన యువతి వాళ్ళు చెప్పినట్టు ఇన్వెష్ట్ చేస్తూ వచ్చింది.
అయితే ఈ సారి ఆమె డబ్బు రెట్టింపు అయ్యి రాక పోగా తన దగ్గర ఉన్న డబ్బు మొత్తం తరిగి పోయింది. అలా ఆ యువతి కేటుగాళ్లకి 19 లక్షలు పోగొట్టుకుంది. వాళ్ళని అడిగినా డబ్బు తిరిగి రాకపోవడంతో చివరికి వాళ్ళు మోసగాళ్లని తెలుసుకుని తల పట్టుకుంది. అనంతరం దగ్గర్లోని పోలీస్ స్టేషన్ కి వెళ్లి కంప్లైంట్ చేసింది.
